Marliturgi ompung

December 30, 2008 at 8:15 pm 5 comments

” Ndang na meret tungkot harajaon sian Juda, manang paruhum sian holangholang ni patna paima ro si Silo, jala Ibana do ihuthonon ni angka bangso ( 1 Musa 49.10 ) “

Nuga leleng tradisi ni HKBP ganup jumpa ari pesta sai diadongkon liturgi. Najolo molo marliturgi, ise na marliturgi i ingkon boi do luar kapala . Na so jadi do marliturge songon si nuaeg on mamboan dohot manjaha bibel. Jala najolo na marliturgi i ndada holan dakdanak alai dohot do nang horong na asing. Ala ni ma sai adong nang tingki dipasahat marliturgi tu horong ni angka ompung-ompung.

Jadi songoni ma sahali di sada Huria. Marliturge ma angka ompung-ompung. Sada sian sahalak Ompung baoa naung marumur hurang lobi 75 taon. Mansai las do rohana dipadohot Guru Huria ibana marliturge. Tung sian nasa rohana do mangapil turpuk  na ditupukhon liturgehonon na.  Andorang so marliturge disangkap rohana do asa jolo dipatubegohon jo tu angka pinompar na, ipe asa borhat tu gareja. Ala ni holan diboto ibana bortik na dohot ibana dipillit marliturgi, pintor dipaboa do na masa i tu angka helana, parumaen na di luat na dao dohot na jonok. Dipaboa ibana do na ingkon dohot ibana marliturge di natal na ro. Tung dipatuduhon ibana do tu sude pinomparna, anakna parumaenna, helana, boruna dohot angka pahompuna, paboa tolapsa dope na marliturgi i. Lapatan na naeng dohonon ni ibana na masuk etongan dope ibana atik pe naung Ompung di gareja na i.

Umbege i las do roha ni sude parumaenna, helana dohot angka anakna na. Ba marliturgi natua-tua i, ba bea baenon mulak ma hita tu bona pasogit di natal na ro on tutu, ninna be. Ala ni satolop angka ianakon na i ingkon marnatal tu bona pasogit manumpahi semangat ni natua-tua nasida i. Dibagabagahon nasida dope ingkon jaiton nasida jas na nauli tu Amana i.

Dung dibege Ama na i ro do sude angka pinompar i, lam marsitutu ma ibana mangapil ayat na nileon ni guru huria i tu ibana. Ayat na dipillit i ma sian turpuk,” ndang na meret tungkot harajaon sian si Juda manang panguhum sian holang-holang ni patna” paima ro si Silo. Nuga tangkas diparade ibana dirina dohot tingki na mangapil turpuk i. Lam jonok tingki na dibuhul di bodari ni tanggal 23 Desember ,lam angka dotdot do ibana. Holan diingot ibana naung manjonok ari na marlitugi i lam bobos do rohana. Umbaen na bobos ibana, ala dihilala ibana lam moru do parningotan na. Sai olo ibana hatop lupa. Alai nang pe songoni bersemangat do ibana. Ganup manogot, disi dungo, martapian, dungi sarapan. Sae sarapan dipungga ma muse na mangapil dohot manghatahon liturgi na i. Sipata disangajo do didok i  tu pardijabuna lao mansubo haboion na. Sian ari tu ari nungga tung marhasil ibana dohot denggan. Ala ni dung ro angka pinomparna bodari ni tanggal 22 desember nungga rade ibana marliturge dijolo nasida. Tung tiur do ibana na marliturge i. Umbege i tung  marolopolop do sude angka pahompuna, parumaen dohot helana. Martopak do nasida sude. Mantap bah, katuanta on, ompungta on, ninna be.

Las do rohana ni natua-tua manjalo angka topap-topap i. Alai ndang piga dan nari, soro do muse bobos ni rohana. Ninna dibagasan rohana, tutu borgin on adong do haboion na, alai beasa sai biar rohangku ninna rohana. Ianggo pahompuna siangkangan, panggoarina i pintor diboto do na piningkiran ni ompung na i. Umbaen na didok, ompung pos ma roham. Di lambung mu do au bodari sogot tingki marliturge ho. Hubaen pe na huboto asa hot gogom marningot liturgimi. Alai ianggo natuatua i, nang pe dihaol do pahompuna i, jala didok pos do rohangku ompung, ninna. Iango dibagasan rohana sai tong do marhusari, bea ma bodari sogot so tung sala ma au on, maila ma hami na saripe, ndang boi annon idaon ni angka dakdanak on bohina maradopophon halak na asing, ninna rohana. Alai ndang apala dipabotohon i tu ripena nanung tu pinomparna. Holan tu pahompuna panggoarina i  do dihusiphon songonon. Boti ba ompung ninna manjou pahompu panggoaran na. Bereng, ninna ibana. Parrohahon da anaha, atik bea lupa au doba marsogot na marliturgi i. Boan tungkothon da. Atik bea lupa iba, bea baenon doba nungga matua iba. Pintor juar-juarhon ma tungkothon. Asa pintor hehe muse parningotanhu, ninna. Dungi dialusi pahompuna i ma. Beres ma i ompung, hutiop pe tungkotmon, molo lupa ho, hudok pe Ompung…ompung tungkot, ningku pe. I ma songoni ma dok, pintor boi do mulak rata huingot i. Jala diulahi ma muse na marliturge i  mancek hatauon na dijolo ni pahompuna i. Beres ompung ndang adong na sala, sep, ninna pahompuna i martopap.

Jempek hata dohonon marsogot sore jam 5, lao ma nasida nasaripe rap tu gareja lao mandohoti liturgi tu angka ompung-ompung i. Tung tiur do ari, torop angka na ro sian angka pinompar ni na marliturge i, songoni nang na mainondur. Ribur ma na di gareja i .

Bage do marbaris angka natua-tua i . Ia natua-tua i ndang apala di ronde na parjolo marliturgi. Alai dung pe dironde na paduahon, di hajongjongan na palimahon. Angka parliturge di ronde naparjolo, idaon tung minar be do sude bohi ni na marliturgi i. Sian na marliturge na parjolo i, hira sude do sai adong na sala, atik pe jompok-jompok be do  ayat-ayat nasida na mar liturgi i. Dung sae parliturgi na parjolo, dijou Guru Huria ma muse parliturgi di ronde napaduahon. Tung tongam do angka natua-tua na marliturgie i mardalan tu jolo. Dung sae dijaha Guru huria i hata pamuhai, patandahon angka impola ni liturgi napaduahon i. Dimulai ma na marliturge i. Sian naparjolo sahat tu nomor tolu na marliturgei, godangan do nasida sai mongkot, jala sala-sala. Alai ganup adong na sala, ndang apala adong soara na mangalesengi, holan na mengkel suping do sude angka pinompar nasida dohot situan natorop umbege angka ompung-ompung na marliturgie i.

Dung i sahat ma tu giliran ni natua-tua i. Atik na beha ma i, ditondong dongan na i ma ibana,huhut didok. Nuaeng ho na ma katua, ninna. Holan ditondong tompu songoni, nungga gabe mago sude sian utok-utok na na niapil nai. Alai sanga dope dialusi mandok, “bea”, au nama ninna ibana mangalusi dongan na i. Olo ho na ma ba katua, ninna dongan na i mangulakkon. Tole ma, au nama tutu ninna natua-tua i. Idaon sian pardompahan na tung tangkas do marsitutu marningot naniapilna i. Sai mangubitubit do nang pamangan na idaon. Alai tung pe dibaen nasa gogo na, holan sada hata do na boi haruar sian pamangan na, i ma hata parjolo i. “Ndang na meret”, ninna mamulai. Alai pintor sangkot, diulangi ma muse mandok,” Ndang na meret”. Sampe 3 hali sai tong sala, jala ndang diboto manorushon. Daga ninna rohana. Nungga mulai holom bohina, alai maila ibana mulak hundul tu bangku na.

Alai tingki songoni ma na masa i. Disi ma tompu ro pangurupion sian pahompuna na panjuar-juarhonhon tungkot ni ompung na i tu ginjang. Ompung…ompung… tungkot ,,tungkot, ninna. Dungi ditangkup ompung na i do hatop hata ni pahompuna i. Dungi ditorushon ibana ma muse liturge na i,” ndang na meret tungkot”. Ndang na meret tungkot.., alai tong ndang diboto manguduti. Diulanghon sampe tolu hali nari, tong sangkot. Ndang boi dipajojor dohot denggan…. Ndang na meret tungkot, ninna paopathalihon… tong do ndang haruar be hata na asing dipingkiran na. Alai tompu sian na so panagaman ni natuatua i haruar ma sian roha dohot pingkiran mandok, molo on tung lancar do diingot sude. “ Ndang na meret tungkot. Sian roha na mandele. Pintor haruar ma sian na so panagaman uju marmeam ibana dohot dongan na magodang di sihadakdanakon na. Molo i pintor lancar do jala hatop. “Ndang na meret, tungkot jom amani mallotom nabibi na malamun tangkot gaol natata., anginghu mergekergek ibotonghu martata…  

Dung sun diultophon songoni marungut-ungut ma ibana. Huhut dung didok songoni laos haruar ma hatana,” bolo-bolo ni lojana i au paapil-apil i , meong ma i, ima tahe guru on sai dibaen siapilon na ganjang-ganjang, ninna. Ditadingkon ibana ma inganan parliturgean i, ditolpas angka jolma na margak-hargak i, jala mulak tu jabu. Margak sude natorop i, laos songoni sude angka pinomparna. Holan haruar ibana sian gareja, sian roha na ribur. Didok angka ianakon na ma, beta ma hita mulak deba bea baenon nang pe songoni ndang sae dope liturge di gareja. Deba laos diihuthon angka ianakon na i do mangadu natua-tua i sian pudi.  Dung mulak sude angka pinompar na i tu jabu habis sian parliturgean i, jala rap do dohot ompung boru. Holan disi sahat nasida di jabu, margahargak do sude nasida,  anakna, parumaen, dohot pahompuna. Alai ianggo natua-tua i tung ila do huroha rohana, sai tong do marbete-bete ibana. Sai didok, nian ai ndang siulaon ni namatua be na marliturgi on alai on ma angka guru on,ninna. Sai dipaksa iba, ninna muse manalahon guru Huria. Laos mengkel ma nasida sude.

Amang, unang pola salahon dirim bapa ninna anakna, songoni dohot sian parumaen na. Denggan do liturgi ni ompung i ninna angka pahompuna, hami pe ndang hea hubege hami i. Alai sai didok ibana do, ah ndang olo be au olat ni on marliturge, ai liturge memang tu angka dakdanak na ma i. Ai tagi niba nama on, jala on ma dongan on, ninna, laos dohot ma ibana mengkel. Selamat ari natal ma ninna. Baen hamu ma sipanganon i, ai maradu so mangan iba na piga arion, hape tong sai sala ninna. Ia hata tingki dakdanak iba niingot, ia hata ni Tuhan i so niingot. Tole mangan ma hita, selamat natal ma.

Entry filed under: sigeokgeok. Tags: .

Laporan Kerja Departemen Diakonia Salam tahun baru via sms

5 Comments Add your own

  • 1. baktijsitumorang  |  December 31, 2008 at 10:32 am

    haha.. erget na i ah.
    horas Amang Kadep nami, Selamat Tahun Baru ma nang tu hamu.
    Anggiat marhite Tahun Diakonia 2009 tapaulak ma tutu angka tradisi na uli di bangso Batak, ndada be holan parningotan sambing.
    Tinjauan tu Logo Tahun Diakonia HKBP 2009
    bravo.. pdt bakti situmorang

    Reply
    • 2. Pdt. Nelson F. Siregar STh.  |  January 2, 2009 at 11:32 am

      Trimakasih, jika dibutuhkan saya memamng menulis banyak ceritera dan memang walaupun bisa diedit dalam bahasa Indonesia, tapi saya ingin agar bahasa Batak tidak punah. Kita tahu nasib bahasa di dunia ini sudah banyak yang diambang kepunahan. Alani blog namion anggiat tong boi mangurupi angka naposobulung nian patajom bahasa batak na marhite angka gait na marpanatapan. Pataripar ma nang tu angka halak da, asa dijaha blog on.
      Horas tondi madingin pir tondi matogu.

      Reply
  • 3. Ria Sihombing  |  April 17, 2009 at 11:02 am

    Nga sanga tok ulu niba mangalului bahan na sora dapot on. Toppu nibereng tulisan ni amang on. Gabe mekkel iba toppu. Mago jo arsak.
    Mauliate jala horas ma, amang. Selamat melayani! Sai dipargogoi Tuhanta ma.

    (Titip salam tu kakak)

    Reply
  • 4. rekson sihomibng  |  September 9, 2009 at 4:59 pm

    I like the strory that make me laugh long time…horas ma amang mauliate nungnga mengkel au dibae namang, sai anggiat ma godang pimpinan yang berhati easy laughing not easy angry like mr gusdur..best regards,,tungkot jom amani malotom, kalau bisa dtranslate ke inggris dan indonesia..salam batam hkbp batu aji lama, ress batu aji

    Reply
  • 5. St. Gaya Hutasoit  |  November 3, 2009 at 1:33 pm

    luar biasa. mansai terhibur ahu manjaha sigeok-geok on. Gabe taringot ahu tu omponghu nahinan. tambah lagi lagi amang

    Reply

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Trackback this post  |  Subscribe to the comments via RSS Feed


Categories

Jumlah Pengunjung

  • 28,481 hits

Recent Comments

Eva boru Sormin on Horas ma di hamu – Salam…
http://bestnaturalhe… on Horas ma di hamu – Salam…
lohot simanjuntak H1… on Kegiatan tahun diakonia
St. Gaya Hutasoit on Marliturgi ompung
Benhard Sitohang / B… on Horas ma di hamu – Salam…

Feeds


%d bloggers like this: